الشيكولاتة غذاء الجنة حين تصبح شريرة
أجرى باحثون دراسة علمية حديثة عن مخاطر الشيكولاتة، ذكرت كاثلين زلمان أنها تعد من غذاء الجنة واكتشفت من حبات نبات الكاكاو 1915.
الشيكولاتة حلوة
تقول زلمان "إنك لو فاكر إن الشيكولاتة هي من غذاء الجنة، فإنت مش لوحدك، ده حتى النبته اللي بييجي منها الكاكاو (ثيوبروما كاكاو) معناها (طعام الآلهة)، الشيكولاتة اللي بداية اكتشافها كان عن طريق اكتشاف حبات نبات الكاكاو سنة 1519م، لما حضارة الآزتك كانوا بيستخدموا حبات الكاكاو المحمصة وبيضيفوها للمية عشان يعملوا مشروب مسكر، ومعروف طبعًا إن الشوكلاته الغامقة بتكون أفضل من الشوكلاته اللي باللبن، لأن فايدة الشوكلاته الحقيقية جاية من مادة (الفلافونويدز)، الموجودة فى حبات الكاكاو، واللي تركيزها عالي في حبات الكاكاو الغامقة أكتر بكتير من اللي في الشيكولاتة اللي باللبن أو الشيكولاتة البيضاء طبعًا، طبعًا لو عايز تعرف مكونات الشيكولاتة حسب أنواعها المختلفة"
فممكن جدًا تعرف بشكل مبسط إن مكونات:
- شيكولاتة الخبز الغير محلاة: فيها مسحوق الكاكاو فقط.
- الكاكاو البودرة: هي زبدة الكاكاو المجففة.
- الشيكولاتة الغامقة: خليط من السكر وزبدة الكاكاو ومستخلص الشيكولاتة وبعض الفانيليا.
- الشيكولاتة بالحليب: هي إضافة الحليب إلى الشيكولاتة الغامقة.
- الشيكولاتة البيضاء: هي خليط من السكر وزبدة الكاكاو والحليب والفانيليا (بدون مستخلص الشيكولاتة).
ليه الشيكولاتة ممكن تكون شريرة!؟
الكاكاو آمن لمعظم الناس، لكن لأن فيها ” كافيين ”، فأكل كميات كبيرة من الكاكاو ممكن يسبب مضاعفات مرتبطة بالكافيين، زي العصبية، الأرق، زيادة ضربات القلب، الحساسية، الإسهال، وممكن كمان تبدأ نوبة صداع نصفي، ده غير إنها ممكن تعمل غثيان ومغص وغازات، إذ أردت نتكلم بشكل مفصل أكتر نقدر نلخص المشاكل في الآتي:
- الحمل والولادة:
- الكاكاو آمن إلى حد ما في الحمل ومرحلة الرضاعة الطبيعية، خصوصًا لما يبقى استهلاكها بكميات معقولة، لكنها ممكن تكون خطيرة لو زادت كمياتها، لأن الكافيين الموجود فى الكاكاو بيعدي من الدم إلى المشيمة، وبالتالي ممكن يزيد نسبة الكافيين فى الدورة الدموية للجنين إلى نسبة مقاربة ليها فى الأم، إيه المشكلة في ده، إن بعض الدراسات بتربط بين نسبة الكافيين العالية وبين الولادة المبكرة أو انخفاض وزن الجنين أو الإجهاض، عشان كده بعض الخبراء بينصحوا إن استهلاك الكافيين للأم ميزيدش عن 200 مج يوميًا طوال فترة الحمل، تقدر تعرف بقى إن قطع الشيكولاتة فيها حوالي 2 - 35 مج كافيين .
- الرضاعة:
- الكافيين من الحاجات اللي لازم ننتبه ليها جدًا وقت الرضاعة، العلماء بيقولوا إن تركيز الكافيين فى لبن الأم بيكونوا تقريبًا نص تركيزه في دم الأم، لو الأم بتاكل الشيكولاتة كتير (أكتر من 400 جرام يوميًا)، ف الطفل اللي بيرضع غالبًا هيبقى طفل ” متوتر ”، وغالبًا هيكون جهازه الهضمي مضطرب بسبب الكافيين.
- التوتر:
- في دراسات كتير بتربط بين زيادة نسبة الكافيين (نتيجة استهلاك كمية كبيرة من الشيكولاتة) وبين زيادة أعراض” اضطراب القلق” وإنها تصبح أسوء.
- أمراض الدم:
- الكاكاو ممكن يقلل من تجلط الدم، وبالتالي استهلاك كمية كبيرة من الكاكاو أو الشيكولاتة ممكن يزيد من سيولة الدم وبالتالي يزيد من أعراض أمراض الدم زي زيادة النزيف أو الكدمات.
- حالة القلب:
- الكافيين فى الكاكاو ممكن يسبب اضطراب في ضربات القلب عند بعض الناس، وعشان كده لازم أكل كميات كبيرة من الشيكولاتة يكون بحذر خصوصًا عند مرضى القلب.
- السكر:
- الكاكاو طبعًا ليه القدرة على إنه يرفع معدل السكر فى الدم، وعشان كده ممكن يتعارض مع علاجات مرض السكر.
- الإسهال:
- الكافيين بكميات كبيرة بيعمل اسهال وممكن كمان يزيد حالة الاسهال (لو موجودة من الأول) سوءًا.
- الارتجاع:
- مرض ارتجاع المرىء، أو ضغط صمام المعدة العلوي المرتبط بالمرىء، بيزيد مع استهلاك كميات كبيرة من الشيكولاتة، لأن الكاكاو بيقلل من كفاءه الصمام ده أكتر.
- الجلوكوما (ارتفاع ضغط العين):
- الكاكاو بيزيد من ضغط العين وبالتالي يزيد أعراض مرض الجلوكوما.
- ارتفاع ضغط الدم:
- الكافيين في الكاكاو ممكن يزيد ضغط الدم في مرضى ارتفاع الضغط وبالتالي برضه لازم يكون أكل الشوكلاته بحذر، لكن بالنسبة للناس اللي كده كده بتستهلك كميات كبيرة من الكافيين، غالبًا الشيكولاتة مش هتأثر أوي فى الضغط.
- متلازمة اضطراب الأمعاء:
- الكافيين اللي في الكاكاو ولما يكون بكميات كبيرة، قادر جدًا يزيد أعراض اضطراب الأمعاء.
- الصداع النصفي:
- الأبحاث بتقول إن الكاكاو ممكن جدًا يسبب نوبات صداع نصفي عن بعض الناس.
- هشاشة العظام:
- الكافيين ممكن يزيد كمية الكالسيوم اللي بتٌفقد فى البول، وعشان كده ممكن يضعف هشاشة العظام خصوصًا فى الأشخاص اللي بيعانوا أصلاً من الهشاشة.
- العمليات الجراحية:
- الكاكاو بيتعارض مع الحفاظ على نسبة سكر الدم آمنة خلال وبعد العمليات الجراحية، عشان كده يفضل الامتناع عن تناول الشيكولاتة قبل العمليات الجراحية بأسبوعين تقريبًا.
- زيادة معدل ضربات القلب:
- الكاكاو في الشيكولاتة الغامقة ممكن يزود معدل ضربات القلب، زي ما ممكن جدًا يخلي أعراض ” اضطرابات ضربات القلب ” أسوء.
